ასოციაცია „ქალები ღვინის ინდუსტრიაში“ წევრების წარმატება IWSC-ის საერთაშორისო კონკურსზე
2023 წელს საქართველოში გამართულ საერთაშორისო კონკურსში IWSC (International Wine and Spirits Competition) - Wine Judging in Georgia ასოციაცია „ქალები ღვინის ინდუსტრიაში“ წევრები მონაწილეობდნენ. ასოციაციის წევრთა ღვინოებმა ჟიურის წევრთა დიდი მოწონება დაიმსახურეს, რაც მათ მიერ აღებულ ოქროს, ვერცხლისა და ბრინჯაოს მედლებში აისახა.
ოქროს 18 მედალოსანთა შორის იყო გურჯაანის მუნიციპალიტეტის, სოფელ ჩუმლაყში მდებარე კომპანია „ექიმის ბიო მარანი“, რომელმაც საერთაშორისო კონკურსში პირველად მიიღო მონაწილეობა.
„ეს ჩემთვის საერთაშორისო კონკურსში მონაწილეობის პირველი შემთხვევა იყო. წარვადგინე ჩემი მარნის მხოლოდ ერთი ღვინო, 2021 წლის ქვევრის გაუფილტრავი რქაწითელი. კონკურსში განაცხადის გაკეთებისთანავე ვფიქრობდი, რომ ჩემი ღვინო იყო მაღალხარისხიანი და ამიტომ გავაკეთე განაცხადი. თუმცა, დაჯილდოების ცერემონიალზე რომ მივედი, იმდენი უძლიერესი კომპანია და ღვინის მწარმოებელი იყვნენ, რომ ცოტა შევშინდი. ჩვენმა ღვინომ, სასიხარულოდ, ოქროს მედალი მიიღო“, - განაცხადა „ექიმის ბიო მარანის“ დამფუძნებელმა მარიეტა კაკიაშვილი-რუაძემ.
ასოციაცია „ქალები ღვინის ინდუსტრიაში“ ულოცავს ყველა გამარჯვებულს და აღნიშნავს, რომ ეს წარმატება კიდევ ერთხელ უსვამს ხაზს ქართული ღვინის ხარისხსა და პოტენციალს საერთაშორისო ასპარეზზე.
გალერეა
